طريقة طبخ المندي

في البداية احلى مافي الحياة التمسيكات واللي لها طعم ونكهه وكشنه تكون احلى واحلى..



واهم شي يكون معك ناس لامن قلت لهم شي قالوا لك تم سواء اخوياك والا زوجتك والا اين كان لو هي شغالتكم.
هذي ياحبايب البي طريقة طبخ المندي بالفرن لا وبعد بالصور اتمنى تحوز على رضاكم لاني من جد تعبت تلقوني شوي اقطع وشوي اصور وخلوها على الله بس..
نبدأ بسم المولى جل في علاه اول شي نقطع البصل ونحطه بالقدر يعني باللغه البتاعية نجهز الكشنه كما في الصورة




المهم وقت منت جالس تجهز الكشنه رح جهز الدجاج وخله على جنب

ثمن عقبها قطع الطماط عشان تضيفه على الكشنه عقب شويات من الدقايق
طبعا كلن ومايشتهي من اضافات

انا صراحه لو اموت مااتخلى عن حياتي البطاطا
ومع ذا الطبخه اضفت لها اللي يسمونه (( البرطيخ )) القرع

طبعا كلن ومايشتهي اللي يبي كوسه والا جزر بكيفه انا مالي دخل




ثمن يجيب الطماط اللي قد قطعه من اول ويضيفه على البصل( الكشنه )

وهاتك تحريك الين مايقولون لك خلاص دوختنا يرحم امك<<<سماجه على الماشي





المهم نروح للدجاج ونبدأ نداعبه بكم من شي مثلا نضيف عليه البهارات من
ملح وكمون وحركات انتو ادرى بها طبعا كما في الصورة اللي تحت

اللي صدق مدري وش تبي مدري وش يسمونها هالزاويه محترفي التصوير




ثمن برضوا قبل لا انسى اضيفوا للبهارات معجون الطماط ولا تكثرون

ثمن تندمون وتشيلونه بيديكم مثل اللي في بالي

واذا عزمتوا تنقصون منه شيلوه بملعقة والا بمنشفه والا اي شي يعني بالعربي

وشهو له بايديكم








ثمن تخلطون الدجاج مع المعجون والبهارات طبعا نصيحه خلو مثلا الملح

زايد شوي عن العادة





عقبها جيبو القصدير وادبلوه يكون احسن
وحطوه فوق الشبك اللي يكون داخل الفرن

وحطوا عليه الدجاج

الا تعالوا بغيت انسى اهم شي في الشغله كلها قبل لا تحطون الدجاج على القصدير

خرموه من تحت يعيني افتحوا فتحات صغيرة في القصدير على حسب حجم الدجاج

سواء بقلم رصاص والا حبر والا سكين اهم شي خرقوه من تحت

عشان تصير احسن واهم حركه الا و هي انه يندي الدجاج على الارز






طبعا اكيد انتو راح تكونون اثنين والا اكثر بالمطبخ فوقت ماالثاني يخرق في ذا القصدير

الثاني الله لا يهينه يروح لم القدر طبعا الكشنه راح تكون جاهزة يضيف عليها موية حسب الحاجه

ويضيف الرز ويضيف الملح حسب رغبته ان شاء الله حط علبه كامله بكيفه

هو اللي بيرتفع ضغطه <<<اقول لا يطق فيك عرق بس







ناخذ القصدير اللي فيه الدجاج وندخله بالفرن
ونراعي بان نخلي مساحه تحته للقدر اللي فيه الارز










ثمن ندخلونه الفرن مع الدجاج

واهم شي تخبرون يوم اننا قلنا تفتحون فتحات بالقصدير

جينا الحين لفايدتها نحاول نحط القدر تحت الفتحات هذه مباشرة عشان

اي شوائب او اي شي ثاني ينزل على طول لم الرز يالقدر

زي اللي بالصورة حدر




طبعا يبي له على الاقل ساعه الى ساعه وربع

لاتنسون هذا للي بيسوي دجاج

عاد اللي مقرش ودراهم واجد وعنده لحم

يبي له مالا يقل عن ساعة ونص الى ساعتين

طبعا انت بذا الفترة اكيد بتكون فاضي

وتكون قد صحيت من بدري لامور سياسية خاصة

فامداك قد شيكت على الايميلات كلها وطفشت من النت
ففي هاللحظه لا هنت رح جهز لزوم السفرة من بيبسي وشطه

وحركات من سلطه والا اي شي انت تبيه






طبعا في ناس بتقول ان العلبة القزاز فاضيه
انا بقولهم برافوا عليكم اعجبتوني على حسن لقافتكم

السالفه ومافيها اني توي صاب اللي بالقزازة في العلبة البلاستيكيه

فلو اصور بس البيبسي والعلبه البلاستيكيه

ماراح تطلع الصورة اوكيه فقلت ياولد زد بالقزاز جنبهم

عشان ينقال عنك تاجر<<<<الله يستر عليه اللي في بالي

يوم انه يقول وهو متنرفز هالعبارة

طيب وش رايكم مدام انه يبي لنا حوالي الساعه الين مايستوي

وش رايكم اقول لكم سالفة كلمة تجار

هذه ياطويلين الاعمار

انتشرت بين الشباب من اخويانا قبل فترة فلان غني وفلان فقير طبعا بيننا بين

من باب الضحك وتضيعة الوقت

المهم كنا على اي شي نتريق على بعض يعني انت يافلان يمكن في الليله تصير لك ثلاث مواقف
او اكثر بعضها بينقال لك فقير وبعضها غني على حسب

المهم مالك في الطويلة

ذاك اليوم تجمعنا ورحنا نتعشى بشواية الخليج

ومعنا واحد من الشباب اثر ذا الحركة ماكله معه ومااعجبته

طلبنا عشانا من الشوايه بس خبركم الله يهديم مايكثرون رز

فجينا تعشينا وكنا واجد وعلى اخر العشاء في ناس مو مسالة انهم مفترسين مايقومون من السفرة

قد ماهم بس يروقون الدعوه خوينا ذاك للحين قاعد مهم يعني بالعربي بقى يمكن حوالي الاربعه على السفرة

فحس ان الرز معاد بيكفيهم

فقال واحد من اللي قد اشبعوا تبون نطلب رز زيادة فطمر خوينا

وقال له لا مو لازم ذا بيكفي والا لازم نقوم وباقي فيه شي بالسفرة عشان
لا جوا ناس عقبنا يقولون والله سفرة تجار

طبعا ادري ماتضحك الحين ولا راح تضحكون زي ماضحكنا بوقتها لانها طلعت منه ومن قلب بعد بس قلت اتسلى معكم الين مايستوي اللي شرحته لكم تو

الا على فكرة عندي لكم سالفه ثانيه عن ذاك اللي قال لي طماااااع

والا أقول خلوها بعدين في تقرير ثاني عشان ودي الحق على غدانا قبل لا ينحرق

ثمن عقبها مافي الا فطيرة لوزين






طبعا نروح للفرن ونطفي النار ونطلع القصدير
ونطلع قدر الارز ونحطهم بصحن

ونقرب عدة السفرة من طيران وو.... هي هي هي ياابو وش اللي طيران

اسف اسف نسيت اقصد البيبسي

ويستحسن علب صغيرة ام ريال للي مو عجزان مثلي يروح لم البقالة ويجيب اثنين بيبسي


طبعا في الصور اللي تحت يكون بشكله النهائي








يم يم يم بالصحة والهناء على قلوبكم
تموا حياكم الله











من مواضيع : قمر النجوم| شعر الحب الاول| نكت مميتة من الضحك| نكت تافهه 2010| نكت رائعه كشخه| نكت وحكايات مضحكة| نكت وجواب| شعر دمعه حزن| اناشيد الطفل والبحر| اناشيد للافراح| فيديو عربية






« طبخ الارز | طبخ السبانخ »


أدوات الموضوع
مشاهدة صفحة طباعة الموضوع
أرسل هذا الموضوع إلى صديق

انواع عرض الموضوع
العرض العادي
الانتقال إلى العرض المتطور
الانتقال إلى العرض الشجري


المواضيع المتشابهه
الموضوع كاتب الموضوع المنتدى مشاركات آخر مشاركة
طريقة عل المندي بالبرميل بالصور فجر الماضي اطباق رئيسيه 2 04-22-2010 08:23 PM
طريقة طبخ ارز المندي بالصور فجر الماضي اطباق رئيسيه 2 03-16-2010 05:04 PM
طريقة عمل الرز المندي بالصور فجر الماضي اطباق رئيسيه 1 03-16-2010 04:14 PM
طريقة عمل ارز المندي بالصور فجر الماضي اطباق رئيسيه 0 02-17-2009 06:12 PM
طريقة طبخ الارز المندي بالصور فجر الماضي اطباق رئيسيه 0 02-16-2009 05:24 PM




الساعة الآن 05:47 AM.

مشكوووور
ما قصرت

تسلـــــم و الله أنت تجوعني أكثر ههههههههههههههه